ភ្នំពេញ៖ អគ្គនាយកដ្ឋានពន្ធដារ បានចេញសេចក្តីណែនាំឱ្យម្ចាស់អាជីវកម្មហាងទំនិញលក់រាយ និងស្ថានីយប្រេងឥន្ធនៈ ឬឧស្ម័នហ្គាស ត្រូវចេញវិក្កយបត្រតាមទម្រង់របស់អគ្គនាយកដ្ឋានពន្ធដារ ដោយអាចសរសេរដោយដៃ ឬម៉ាស៊ីនគិតលុយតាមប្រព័ន្ធPOS ឬតាមប្រព័ន្ធអេឡិចត្រូនិកផ្សេងៗ។ នេះបើយោងសេចក្ដីណែនាំចុះថ្ងៃទី១៨ ខែកញ្ញា ឆ្នាំ២០២៣ ចេញដោយអគ្គនាយកដ្ឋានពន្ធដារ។

តាមការណែនាំ គ្រប់ហាងទំនិញលក់រាយត្រូវរៀបចំប័ណ្ណទទួលចំណូលសរុបប្រចាំថ្ងៃ ដោយបូកសរុបវិក្កយបត្រដែលបានចេញប្រចាំថ្ងៃ ដោយឡែកចំពោះសហគ្រាសប្រកបអាជីវកម្មស្ថានីយប្រេងឥន្ធនៈ ឬឧស្ម័នហ្គាស ត្រូវរៀបចំប័ណ្ណទទួលចំណូល (Receipt Voucher) សរុបប្រចាំថ្ងៃ ដោយបូកសរុប វិក្កយបត្រដែលបានចេញប្រចាំថ្ងៃ ទៅតាមទូឬម៉ាស៊ីនចាក់សាំងនៃស្ថានីយនីមួយៗដាច់ដោយឡែកពីគ្នា។

អគ្គនាយកដ្ឋានបានបញ្ជាក់ថា៖ «ទម្រង់ប័ណ្ណទទួលចំណូលសរុបប្រចាំថ្ងៃ ត្រូវមានការិយបរិច្ឆេទ និងលេខរៀងជាលំដាប់ពេញមួយឆ្នាំ ដោយត្រូវមានព័ត៌មានលម្អិតនូវ ចំនួនវិក្កយបត្រប្រចាំថ្ងៃដែលបានចេញ (លេខរៀងចាប់ផ្តើម និងលេខរៀងចុងក្រោយប្រចាំថ្ងៃ) លេខសម្គាល់ទូឬម៉ាស៊ីនចាក់សាំង លេខកុងទ័រ (លេខចាប់ផ្តើម និងលេខចុងក្រោយប្រចាំថ្ងៃ) និង ចំនួនទឹកប្រាក់សរុប»។

អគ្គនាយកដ្ឋានពន្ធដារបានឱ្យដឹងថាការធ្វើបែបនេះគឺដើម្បីពង្រឹងវិធានការប្រើប្រាស់វិក្កយបត្រធម្មតាឱ្យមានសង្គតភាព ស័ក្កិសិទ្ធភាព និងត្រឹមត្រូវស្របតាមច្បាប់និងលិខិតបទដ្ឋានច្បាប់ស្ដីពីពន្ធដាររបស់ប្រទេសកម្ពុជា៕